قومی کرکٹ ٹیم کے سابق کپتان رمیز راجہ نے فاسٹ باؤلر محمد عامر کی ریٹائرمنٹ پر دیگر نوجوان کھلاڑیوں کے لیے اہم پیغام دیدیا۔ 58 سالہ رمیز راجہ نے سوشل میڈیا پر اپنے ٹویٹ میں لکھا کہ ’’محمد عامر ریٹائر ہوگئے، سُپر سٹار کے یوں چلے جانے کا افسوس ہے، محمد عامر کی ریٹائرمنٹ کے فیصلے میں بہت سے نوجوانوں کے لیے سبق ہے، نوجوان اپنی صلاحیتوں کا احترام کریں اور اپنی ذمہ داریوں کو سمجھیں،نوجوان دولت کو عزت پر فوقیت نہ دیں، عزت ایک مضبوط کردار رکھنے سے حاصل کی جاتی ہے نا کہ دنیاوی چمک دمک سے‘‘۔
خیال رہے کہ محمد عامر نے مینجمنٹ سے مایوس ہو کر کرکٹ چھوڑنے کا فیصلہ کیا۔ فاسٹ بولر محمد عامر نے پاکستان کرکٹ ٹیم کی مینجمنٹ پر برستے ہوئے کہا کہ انہیں ذہنی طور پر ٹارچر کیا جارہا ہے۔ انہوں نے کہا کہ اتنا ذہنی دباؤ برداشت نہیں کرسکتا ، موجودہ ٹیم منیجمنٹ مجھے کھلانا ہی نہیں چاہتی، فی الحال اس مینجمنٹ کی وجہ سے کرکٹ چھوڑ رہا ہوں۔ دوسری جانب پی سی بی نے عامر کے ریٹائرمنٹ کے فیصلے کو ذاتی فیصلہ قرار دیتے ہوئے کہا کہ آئندہ کسی بھی انٹرنیشنل میچ کیلئے محمد عامر کے نام پر غور نہیں کیا جائے گا۔
