مڈل آرڈر بیٹر شعیب ملک کو صہیب مقصود کی جگہ آئی سی سی مینز ٹی ٹونٹی ورلڈکپ کے لیے قومی سکواڈ کا حصہ بنالیا گیا جس پر فاسٹ بائولر محمد عامر کی جانب سے طنزیہ ٹویٹ سامنے آیا ہے ۔ محمد عامر نے اپنے ٹویٹ میں لکھا کہ’’اللہ بہت بڑا ہے،روک سکو تو روک لو‘‘۔
صہیب مقصود کمر کی تکلیف کے باعث قومی ٹی ٹونٹی سکواڈ سے باہر ہوگئے ہیں۔
ان کا ایم آر آئی سکین 6 اکتوبر کو کروایا گیا تھا۔ چیف سلیکٹر محمد وسیم کا کہنا ہے کہ صہیب مقصود کا آئی سی سی مینز ٹی ٹونٹی ورلڈ کپ سے باہر ہونا افسوسناک ہے ۔ انہوں نے اس ایونٹ کے لیے قومی سکواڈ کا حصہ بننے کے لیے بہت محنت کی تھی ۔ ہمیں ان کا احساس ہے مگر انجریز کھیل کا حصہ ہوتی ہیں۔
انہیں یقین ہے کہ صہیب مقصود اپنا ری ہیب پروگرام مکمل کرنے کے بعد جلد دوبارہ قومی کرکٹ ٹیم کو دستیاب ہوں گے۔
ٹیم مشاورت کے بعد ہم نے ان کی جگہ شعیب ملک کو قومی اسکواڈ میں شامل کرلیا ہے۔ شعیب ملک کا تجربہ قومی اسکواڈ کے لیے بہت کارگر ثابت ہوگا۔ شعیب ملک نے 2007 میں کھیلے گئے پہلے ٹی ٹونٹی ورلڈکپ میں پاکستان کی قیادت کی تھی۔ وہ 2009ء ورلڈکپ کی فاتح قومی کرکٹ ٹیم کے سکواڈ کا بھی حصہ تھے۔ انہوں نے 2012ء ، 2014ء اور 2016ء کے ٹی ٹونٹی ورلڈ کپ میں بھی پاکستان کی نمائندگی کی تھی۔
